)وصلني
عالايميل من كام يوم أطرف صور بالعالم على الاطلاق … ومن ضمن هالاطرف لقيت
أنو أطرف الشي الصورة يلي عاليمين… طبعاً هالشخص ما ذنبو و مسكين … والحق
كل الحق على ابوه يلي النفاق عم يشرشر من كواعو لحتى سما ابنو هيك اسم
وأكيد في مصلحة كبيرة من ورا هالاسم ومليون بالمية وصل لهدفو .. وإذا ما
وصل لهدفوا فالله لا يقيمو
بس شو دخل الصورة التاني..
هلأ
لما شفت اسم خربة عمو عالهوية تبع ( نعم لحافظ الأسد حسين الحسن) قلت لشوف
وين هاي خربة عمو .. طلعت ضيعة من ضيع القامشلي الغارقة بالجهل والإهمال
الخدمي متل كل ضيع هديك المنطقة .. ومتل تلت رباع ضيع الوطن يلي كان البعث
يتغنى بمآسي ابناءها ويعمل علهيا مناحات وملاطم وتطبير وكل ما دق الكوز
بالجرة يقولوا الفلاح … الفلاح .. الفلاح.. وصارت 90% من المسلسات بتحكي عن
معانات الفلاحين وظلم الاقطاعيين محاولة من الاعلام التابع للنظام لزرع
الحقد في نفسية ابن الريف ضد ابن المدينة على أساس أنو حقك بالحياة كان
مهدور ومسلوب من ابن المدينة واجا العبث ليحررك من قيود الاقطاع
والبرجوازية يلي متل ما صوروها انها من ذيول وبقايا الاستعمار
ولما تمكن البعث اللعين بالحكم لعن ابو سلسفيل الفلاح على ابو سلسفيل ابن المدينة وطلعت سوريا ريفها قبل مدينتها تعلن روحو لحافظ
الصورة
التاني إذا ما مبينة عليكون هيي لخاروف كركور حديث الولادة بس الله خالقو
بعين وحدة بس.. والصدفة انو كمان هاي الحادثة طلعت بضيعة نعم لحافظ الاسد
حسين الحسن – خربة عمو
بس الظاهر من تكرار الظاهرة الغريبة
هون .. أنو هالضيعة هاي هيي مورد مهم للطفرات .. ولازم بعد سقوط النظام
نحجر عليها ونساويها مختبر أبحاث متطورة حتى لو حطينا نص ميزانية الدولة
عليها لدراسة هالطفرات النادرة الوجود.. والتي صدف تكرارها بنفس الضيعة
* * * * * * * * *
على سيرة هيك اسم …
كان في ولد هندي احمر قال لابو:
يابي .. ليش أسامينا طويلة ومعقدة وبشعة
قالوا بالعكس .. أسامينا ذات دلالة
قالو كيف يعني
قالو نحنا الهنود بنسمي المولود على اول منظر طبيعي بنشوفوا
يعني
.. أخوك الكبير .. لما ولدتو امك فتت انا عالخيمة وشفتو و اول ما طلعت شفت
القمر قمت سميتو القمر الطالع بين غيمتين سود فوق التلة الصفراء
واختك .. سميتا الشجرة الطويلة ذات الزوايا المستديرة لأني شفت شجرة سرو مقرومة من الجوانب
… طيب انتي ليش زعلان يا كلبين عم يشخوا ورا الخيمة!!!!!